بقالي كتير ما كتبتش.. لأسباب إنه الحياة كانت بدأت تبتسملي وكنت بدأت أرتاح وحياتي تمشي في مسارها الصح.. بس مؤخراً مش عارفة ايه اللي بيحصل
أنا مش مبسوطة، الحمد لله راضية، بس تكرار الألم والفشل متعب اوي.. الحاجة اللي كنت فاكرة إنها خلاص هتعوضني عن كل اللي فات وعملت عشانها كتير عشان تحصل، فجأة تخلّت عني وسببتلي صدمة مش عارفة ممكن أتخطاها امتى
أنا في حالة مش مستقرة أبدا، يوم بضحك ونشيطة ومتفاعلة مع الناس، ويوم مش قادرة أكلم حد خالص..
عاوزة أخرج من الحالة دي في أسرع وقت مفيش عندي وقت أضيعه، بحاول ما أعيطش ومافتكرش أي حاجة ممكن توجعلي قلبي، بس الحاجات بتحاصرني طول الوقت..
برفض الاستسلام وبتظاهر بالقوة، بس أنا مكسورة جداً وهشة جداً، محتاجة إيد تطبطب عليا وحضن يطمني وكلمة تقولي إنه كل حاجة هتبقى كويسة، وإنك ماتستاهليش كل الألم ده، وإنه ربنا شايلك الأحسن..
أنا بحاول أعدي الأيام على أمل إني أصحى في يوم ألاقي نفسي بقيت كويسة، بلهي نفسي بالنوم والخروج والفرجة على الأفلام اللي تخلي دماغي تبطل تفكير، دي كلها مسكنات مش حلول أنا عارفة، بس ما زلت ماعنديش القدرة إني أعمل غير كده، مش قادرة أتكلم مع حد أو أفضفض وأعيط قدام حد..
عشان كده الكتابة بتريحني .. عشان كده رجعت أكتب هنا
