أنا دلوقتي في مرحلة ممكن أسميها "رحلة البحث عن الذات" .. أفكاري ونشاطاتي وكل حاجة بعملها وحتى الناس اللي بعرفهم كلهم تحت المراجعة وإعادة النظر ..
حاسة كأني طفلة بكتشف نفسي وبكتشف العالم على حقيقته، محتاجة ألاقي نفسي -زي ما بيقولوا-
يعني أنا لما بعرّف نفسي للناس، ايه اللي بيحددني؟ وظيفتي؟ ولا حالتي الاجتماعية؟ ولا شهادتي؟ ولا شكلي ولا كلامي ولا ايه بالظبط؟
قراراتي ومواقفي كلها موضع شك وتفكيربالنسبة لي دلوقتي .. معظمها شايفة انه لو الزمن رجع بيا تاني هاتصرف بشكل مختلف .. مرحلة "البحث عن الذات " تحديداّ سببها ممكن يكون رغبة في "العودة للذات القديمة".. أنا من كذا سنة لما كنت كلي تفاؤل ونشاط وعندي رغبة لتحقيق شئ ما، وبعمل اللي عليا عشان أحققه ..
معظم اللي صدر مني خلال الكام سنة الأخيرة مش أنا، حاجات كانت مسيطرة عليا وبتبعدني عن نفسي وعن أهدافي وهواياتي والحاجات اللي بحبها ..
مع الوقت بقت الحاجات ملهاش روح .. الأيام روتينية، تحولت لإنسانة بتخاف وبتردد وبتتشائم وبتحبط ..
رحلة البحث أو العودة للذات عارفة إنها مش هاتكون سهلة، بس ضرورية، كفاية إنها هاترد فيا الروح ..!
No comments:
Post a Comment