النهاردة واحد من تلك الأيام "الكبيسة" اللي بحس بحزن عظيم يداهمني من كل ناحية ..
ممكن أبسط الأشياء تقلب يومي، أقرأ حاجة تفكرني بذكرى صعبة، أفتكر انا حاجة لوحدي
الأيام الكبيسة دي من أول ما تصحى من النوم بتبقى عاوزها تخلص وتوصل لمرحلة النوم بسرعة، التخدير والهروب المؤقت من كل حاجة .. عشان كده النوم الكتير حل حلو جداً . موقت صحيح بس ممكن نسميه مُسكّن
إزاي بواجه الأيام الكبيسة؟ بالنوم .. بإني انشغل في حاجات كتيير ترهقني بدنياً وذهنياً عشان أنام بسهولة، أتفرج على أفلام بحبها تبعدني عن الأفكار الحزينة، بالصمت لفترة ما لحد ما أحس إني قادرة اتكلم مع الناس من غير تصنع، وباعترف أحياناً بواجهها بأكل حاجات بحبها
بدخل في تحدي مع ذلك اليوم الكبيس، وبخلص منه بأسرع وقت ممكن وبأقل قدر من الحزن والألم
نصيحة: لو حياتك سلسلة من الأيام الكبيسة اوعى تستلم لها قاوم ولا تيأس أبداً .. استعن بالله ولا تعجز
